السلام عليكم ورحمة الله وبركاته
في يوم من أيام الله
تستيقظ صباحا
المهم تصلي صلاتك وتشرب قهوتك ( اليوم عطلة نهاية الأسبوع )
تشعل الميكرو باش تقرا كش جرائد وتسمع آخر الأخبار في كووورة جزائرية
تجد :
"اليوم على الساعة 18:30 مصر- الجزائر"
" الخضر على بعد 90 د عن المونديال "
" مصر - الجزائر( أكون أو لاأكون)"
" لقاء الحسم "
" الفراعنة vs الأفناك "
......الخ
واش كاين اليوم ؟؟؟
المهم تقول نروح نضرب دارة برا كاش مانشري للدار كاش مان نتلاقا مع الأحباب
أول نظرة ليك تصيب :المباني والعمارات ، الأرصفة والطرقات ،الأكشاك والمحلات ، السيارات والشاحنات
الدراجات والحافلات ... كلهم يحملون الرايات الوطنية
واش كاين اليوم ؟؟؟
المهم تروح تتمشى تصيب جماعة تخمس عليهم ، واش تسمع ؟؟
تسمع يقولو :
"اليوم راهم معولين يفرحونا"
"واش هي التشكيلة تع اليوم ؟ "
" واش مالخطة راحين يدخلو بيها اليوم ؟"
" أيا نتلاقاو العشوة على الستة ونص في قهوة الحومة"
واش كاين اليوم ؟؟؟
المهم تزيد تتمشى شوية تصيب :
السيارات طالعة هابطة بالعلامات الوطنية
الذراري مجمعين وكامل رافدين العلامات ويغنيو
واش كاين اليوم ؟؟؟
بصح كاينة حاجة وحدة ملي خرجت مالدار وأنت تسمع فيها :
" معاك يالخضرا... ديري حالة"
سمعتها في الحوانت في السيارات و الذراري يغنيو فيها
واش كاين اليوم ؟؟؟
تولي للحومة تصيب ليجان يشبحو في الحالة ويوجدو في التليفيزيو باش يتلايمو كامل في الحومة
واش كاين اليوم ؟؟؟
تطلع للدار يقولولك تتفرج معانا ولا تروح تتفرج في الحومة مع صحابك ؟
واش كاين اليوم ؟؟؟
تشعل التليفيزيو تلقى مواعيد :
"18:30 ........ ، كلنا وراء ......"
تروح للكالوندريي (رزنامة )
تصيب اليوم : السبت 14 نوفمبر 2009
نعم هو ال14 نوفمبر
هو اليوم الحاسم
هو اليوم المنتظر
هو يوم ليس كباقي الأيام
هو يوم سعادة كل الجزائريين بإذن الله
هو يوم الديفيلي
هو يوم النشوة والنخوة
هو يوم الفرح والسرور
هو يوم تلقى البسمة على وجه كل جزائري
هو عيد كل الجزائريين
بإذن الله ومشيئته
ان شاء الله الجزائر في المونديال
يارب ياعالي انصر منتخبنا الغالي
دمتم في رعاية الله وحفظه